‘E figlie ‘e papà,
chille ca chiagneno miseria,
chille ca prestano ‘e solde c’ o interesse,
chille ca mandano ‘e pacche d’ a Befana, ‘e vigile, ‘e pustine, ‘e tassiste, ‘e tranviere, ‘e signurine ‘e bona famiglia, ‘e guardie, ‘e carcerate, ‘e ferroviere, ‘e salumiere, ‘e mariule, ‘e nutare, ‘e tutte quante d’ a stessa pasta, ‘e giudice, ‘e ricuttare, nisciuno!… Nun se salva nisciuno, nisciuno nisciuno, int’ ‘a ‘sta città nun se salva nisciuno!…

Chille ca parlano ‘e giustizia,
chille ca se ne lavano ‘e mano,
chille ca fanno ‘e fatture,
chille ca nun sgarrano maie,
chille d’ e poste,
chille d’ e tasse, ‘e carruzziere, ‘e verdummare, ‘e ministre, ‘e disoccupate, ‘e bidelle, ‘e lattare, ‘e guardiamachine, ‘e guardiaspalle, ‘e benzinare, ‘e sapunare, ‘e zitelle, ‘e crocerrossine, ‘e prievete, ‘e puttane, nisciuno!… Nun se salva nisciuno, nisciuno nisciuno, int’ ‘a ‘sta città nun se salva nisciuno!…

Chille ca sa pigliano c’o “nord”,
chille che pe dispietto fanno ‘o tifo p’ a Juventus,
chille ca nun teneno niente ‘a perdere,
chille ca scrivono ‘ncoppa ‘e giurnale,
chillo d’ o Vasto, chillo ‘e Furia,
chillo d’ o Vommero, ‘e Succavo, ‘e Furcelle, d’ e quartiere, chille d’ o Rione Traiano,
chille ‘e via Petrarca, d’ a Sanità, d’ o Pallunetto a Santa Lucia,
chille ‘e coppa via Manzoni, chille ‘e abbascia ‘a Ferrovia… ‘e tossiche, l’infermiere, l’avvocate, l’assistente sociale, ‘e panettiere, ‘e finanziere, ‘e parrucchiere, ‘e senzale, ‘e masturgiorge, ‘e fravegature, chille che fanno ‘e scippe ‘mmiezzo ‘a via, ‘e cusigliere, ‘o sindaco, ‘e cammurriste, ‘a polizia, nisciuno!… Nun se salva nisciuno, nisciuno nisciuno, int’ ‘a ‘sta città nun se salva nisciuno!…

E tu? e manch’io! Nun se salva nisciuno, nisciuno nisciuno, int’ ‘a ‘sta città nun se salva nisciuno!…